संतोषवाडी शाळेत आषाढी वारी व वृक्ष। दिंडीचे आयोजन

संतोषवाडी जि.प. शाळेत आषाढी वारीचे आयोजन जिल्हा परिषद शाळा संतोषवाडी येथे वारी आणि वृक्षदिंडी सोहळा उत्साहात साजरा करण्यात आला. लहान वयातच मुलांना आध्यात्मिक, सांप्रदायिक परंपरा, वृक्षारोपण आणि वृक्षसंवर्धन याचे महत्व त्यांच्या बालमनावर बिंबविण्याच्या उद्देशाने वारी आणि वृक्षदिंडीचे आयोजन केले होते. तुळस, आंबा, लिंब, वड, पिंपळ आदी झाडे मुलांनी आणली होती. झाडे लावा, झाडे जगवा, बेटी बचाव, बेटी पढाव अशा घोषणा देत मुलांनी परिसर दणाणून सोडला. दिंडीतील पालखीमध्ये सावित्रीबाई फुले, विठ्ठल-रुक्मिणी आणि झाडांची रोपे ठेवण्यात आली होती. गावातील वारकरी मंडळीही टाळ.. मृदंग, झेंडे घेवून विठ्ठलाचा जयघोष करीत दिंडीमध्ये सहभागी झाले होते. महिला वर्गाची लक्षणीय उपस्थिती होती.यावेळी सरपंच सुनीता मेथे, हणमंतराव गायकवाड, राजाराम घोडके, सचिन कुंभार, नंदकुमार भोसले, तलाठी अश्विनी माने, दादा वाघमारे यांची उपस्थिती होती. मंदिरात हणमंतराव गायकवाड आणि सुरज सावंत यांनी चिमुकल्या वारकरी मंडळींना खाऊ वाटप केले. या दिंडी सोहळ्याचे आयोजन मुख्याध्यापक रमेश वायदंडे, सीमा वायदंडे, दिशा नलवडे, राजश्री कुडचे तसेच शाळा व्यवस्थापन समिती यांनी केले.